O PROGRAMA USC EN TRANSICIÓN PON EN MARCHA UN
PROXECTO DE HORTOS URBANOS NA USC.
O vindeiro 6 de novembro celebrarase unha primeira
xuntanza para a organización dos grupos que se encargarán da xestión dos
hortos.
Dende o
curso 2010-2011, a
Oficina de Desenvolvemento Sostible da USC
ven desenvolvendo varias actividades ligadas á agricultura urbana e ecolóxica a
través do Programa USC en Transición,
unha iniciativa que busca adaptar a filosofía das “comunidades en
transición” ao contexto universitario.
As
“comunidades en transición” priorizan a busca de métodos e accións
que axuden ás comunidades a reducir o seu consumo de enerxía e aumentar así a
súa autosuficiencia. Neste contexto, os hortos comunitarios convértense nunha
excelente ferramenta para reducir a nosa pegada de carbono alimentaria,
promovendo a produción de alimentos no contorno inmediato e reducindo así as
emisións de gases de efecto invernadoiro pola produción e transporte dos
alimentos que consumismos. Mais isto non é todo...
Compartir
un horto pode ser unha experiencia a través da que coñecer a outras persoas que
comparten o interese na agricultura ecolóxica, a horticultura urbana ou
simplemente o traballo na terra. Deste xeito, os hortos son tamén espazos para
a cohesión da comunidade, practicando colectivamente un estilo de vida máis
sostible.
Nesta
ocasión, o Programa USC en Transición busca promover a creación de grupos de
persoas que se comprometan a xestionar algúns dos hortos existentes (na RU
Fonseca e na RU Burgo das Nacións no campus de Santiago, ou na Facultade de
Formación do Profesorado no campus de Lugo) ou, de darse as condicións, crear o
seu propio horto.
Con
este obxectivo, convócase a todas as persoas interesadas a asistir o vindeiro día 6 de
novembro, ás 19:30 h., no Salón de Actos da RU Fonseca
para coñecer de primeira man os detalles do proxecto e organizar os grupos que
se encargarán de xestionar os hortos.
Ademais,
este proxecto quere ser tamén un espazo para a formación onde os coñecementos
tradicionais e os académicos teñan cabida conxuntamente, promovéndose en
consonancia un plan formativo aberto a todas aquelas persoas que queiran
coñecer un pouco máis sobre a agricultura ecolóxica ou a elaboración de comidas
cos alimentos producidos.
CONSULTA O PLAN FORMATIVO
EN: http://www.usc.es/
Para
máis información, contactar con:
Oficina de Desenvolvemento Sostible
Vicerreitoría de Responsabilidade Social e Calidade
Casa da
Balconada, Rúa Nova, 6-2º, Santiago de Compostela
Tlef:
881.811.317 – 881.811.359
e-mail:
plands@usc.es -
entransicion@usc.es
******************************
USC en Transición
Teléfonos: 881.811.317-881.811.359
http://www.usc.es/
0 comentarios:
Publicar un comentario